Emocionuese ndeshja e mbrëmjes së djeshme, teksa dy futbollistët shqiptar Granit Xhaka dhe Xherdan Shaqirin i dhuruan fitoren Zvicrës përballë Serbisë.
Futbollistët festuan golin duke bërë shqiponjën me duar, moment ky që u fiksua jo vetëm nga mediat shqiptare por edhe të huaja.
“The Washington Post”, “The Sun”, “The Associated Press”, “Daily Sabah” dhe“ESPN”, kanë komentuar gjatë ndeshjen e së premtes, por në qendër padyshim ishin dy futbollistët shqiptarë.
Me titullin: “Xhaka dhe Shaqiri shënojnë për Zvicrën, bëjnë me duar simbolin shqiptar”, mediat shpjegojnë se flamuri kombëtar i Shqipërisë ishte në qendër të fitores 2-1 të Zvicrës kundër Serbisë, të premten në Kupën e Botës.
“Granit Xhaka dhe Xherdan Shaqiri festuan golat e tyre, duke bërë një simbol nacionalist të trashëgimisë së tyre shqiptare”.
I pyetur pas ndeshje se përse bëri shqiponjën me duar, Shaqiri u shpreh se: “Në futboll, ti gjithmonë ke emocione. Ju mund të shihni se çfarë kam bërë, dhe kjo është vetëm emocion, dhe unë jam vetëm i lumtur që kam shënuar atë gol. E bëra, dhe ne nuk duhet të flasim për këtë”.
Pas fitores, tifozët e Zvicrës kanë festuar gjatë gjithë natës, teksa në rrugë nuk mungonte as flamuri shqiptar.
